屯門市廣場最近開左間新餐廳，食馬拉菜，飯麵平均$5x-$6x，商場舖黎講好貼地。上星期去買過一次外賣，試左巴東牛肉椰漿飯同海南雞飯。唔可以話驚豔，但對得住個價錢。
今晚諗唔到食乜，再去試一試。坐低打算點菜，中年待應放下一支筆，指指檯上的白紙，叫我自己寫下號碼！我看看餐牌，有一行細字「另需收取加一服務費」！WT......商場舖要收加一，落單叫我自己寫？茶記都有人寫單啦......最後叫埋單，又係叫我出去櫃檯畀！老老實實，不如叫埋個客出去自己攞野食，快餐店咁，真係請少好多人手架！
講返餐飯，叫左椰漿飯配炸雞腿，落單後「馬上」送上。雞腿原來係一早炸定，肉質非常乾、硬。調味幾好。椰漿飯之前試過，水準之作，配料如參巴辣醬、小魚乾好惹味！
檳城蝦麵，份量比較少，正常人一碗唔夠飽，配料有雞絲、半隻烚蛋、一隻蝦。湯底有味，但蝦味唔夠濃郁。
另外叫左一個肉骨茶，呢度嘅肉骨茶，可以「添飲」仲可以揀唔同嘅「肉」，有大骨、皇帝骨、一字骨、雞腳、小骨、仲有大小滲。話說我就快食完碗麵，個湯都未黎，諗住催催，個待應指指個廚房同我講：「出左咪攞比你囉！」WT......我以為自己去錯左澳牛，你新開架，係咪咁好生意唔憂做？
我地揀左皇帝骨，份量有睇頭，有成四舊幾大件嘅皇帝骨，性價比算係咁。但個湯都幾淡，水真係太多，好稀，同好飲真係有距離，但唔算難飲。皇帝骨過左火，好老好鞋，算係勉強咬得郁食到嗰種。
食物，講真算合格，出街食飯，唔伏當贏。但請著個伙記態度咁樣，真係唔知係個老細黑仔定係我黑仔！
——————————————-
SEDAP惹味馬拉
地址：屯門屯隆街3號屯門市廣場二期一樓30-31號舖
電話：27898789
Search